CEBU, Philippines – Gibana-bana sa Cebu City Traffic Operations and Management (Citom) nga moabot sa 80 porsiyentong naparalisar ang transportasyon sa siyudad kagahapong adlawa tungod sa gilusad nga lihok-protesta sa mga drayber nga gipasiugdahan sa Nagkahiusang Driver sa Sugbu (NADSU) pagsupak sa gipatas-ang multa sa mga traffic violations nga gipatuman sa Land Transportation Office (LTO-7).
Dali hinuong gipadagan ang mga sakyanan sa dakbayan sama sa mga buses ingon man ang mga multicab uban sa mga sakyanan sa kabarangayan.
Gani miingon si Citom executive director Arnel Tancinco nga lakip sa nihakot sa natanggong nga mga pasahero mao ang mga six-by-six truck sa Central Command.
Sa susamang kalamboan gisugyot na usab ni Mayor Tomas Osmeña nga kanselahon ang mga prangkisa sa mga sakyanan nga wala padagana kagahapong adlawa.
Ang mayor mipahibawo nga siya nakadawat og positibong tubag gikan sa Land Transportation Franchising and Regulatory Board (LTFRB7).
Apan wala palabya ni Osmeña ang iyang kadismaya ngadto sa LTO-7 ug LTFRB-7 ug kini iyang ginganlan og mga inutil tungod sa lugak niining mga polisiya.
“We are doing whatever we can but I’m really tired of having to continue to do this because our LTFRB and LTO so inutile,” sumala ni Osmeña.
“We had already given them a list of strikers which they have done nothing about except to call a hearing which to me is nothing, that’s binayot nga style,” dugang sa mayor.
Gipadayag hinuon ni LTFRB-7 Director Romulo Bernardes nga iyang ipatawag karong adlawa ang mga operators sa mga sakyanan nga wala mobiyahe kagahapong adlawa.
Kini aron pangayoan og katin-awan nganong sila dili pahamtangan ug suspension o revocation ba hinuon sa ilang prangkisa.
Gitataw ni Bernardes nga ang prangkisa usa lang ka prebilihiyo og dili katungod ang paghupot niini hinungdan nga kini mahimong iribukar.
Samtang ang Cebu City Disaster Coordinating Council pinanguluhan ni Konsehal Gerardo Carillo nagkanayon nga gipanglista na nila kung si kinsa ang mga PUJ nga wala mobiyahe kagahapon ug ilang iduso sa LTFRB alang sa pagpakanselar sa ilang mga prangkisa. (Uban sa report ni Darrel Carumba) (BANAT NEWS)