Kapitan sa Canjulao ipa-recall

CEBU, Philippines – Tinguha sa unom ka konsehal sa barangay Canjulao sa dakbayan sa Lapulapu nga tangtangon pagka-kapitan si Canjulao barangay kapitan Rufo Bering gumikan sa pipila ka mga kwestyonableng transaksiyon niini.

Si Kagawad Magdalena "Inday" Perodes atol sa usa ka rally sa milabay’ng gabii sa maong barangay inubanan sa mga residente sa maong dapit nagkanayon nga wala mohatag og tukmang husay ang kapitan sa mga nagastos ug nakolektang salapi.

Apan namatikdan nga mitambong usab sa maong rally si Lapulapu City Mayor Arturo Radaza ug Bise Mayor Mario Amores lakip ang 29 ka kaalyadong barangay kapitan pinangulohan sa ABC presidente nga si Pajo barangay kapitan Leo Mercado.

Sa maong pakigpulong sa mga kagawad sa Canjulao, ang tanan mikwestyon kang Bering kabahin sa "Abag Silingan," usa ka proyekto ni Bering.

Gipadayag ni Perodes nga gibanabanang moabot ngadto sa 5 mil ka mga miyembro sa “Abag Silingan” mibayad og P30 atol sa ilang pagkahisakop ug gikolektahan og P10 ang mga miyembrong nagpangidaron og 10-anyos pataas.

Ang mga miyembro niini hatagan og P20 mil ug usa ka sakong bugas kun mamatyan.

Apan pipila na ka miyembro ang nahibulong kung nganong dili na matingob ang paghatag sa maong hinabang ug bugtong tubag sa kapitan mao nga kulang ang pundo sa kahugpungan.

Gumikan niini ang konseho sa Canjulao nangita sa maong husay sa nagasto ug nakolekta, apan si Bering hangtod ning pagbalita wala pa makahatag og husay ngadto kanila.

Tungod sa maong reklamo nakahukom ang mga kagawad nga sila si Perodes; Sandra Cabalhug; Alfredo Abas; Ciriaco Pongasi; Angel Gerlie Bagiuo ug SK Chairman Nikki Tampus nga mopasang-at og recall election ngadto sa COMELEC batok ni Bering.

Gisuwayan pagkuha sa Banat News ang habig ni Bering pinaagi sa telepono niini apan pakyas ang maong tinguha tungod kay walay motubag sa cellphone niini ug wala kini sa iyang buhatan. –BANAT NEWS