Nalambigit sa krimen gisurender sa amahan

CEBU, Philippines - Gisurender sa usa ka tanod sa barangay Tanke, dakbayan sa Talisay kagahapon sa kaadlawon ang iyang anak kinsa giingong dunay kalambigitan sa insidente sa pagpamusil diha sa ilang lugar.

Ang biktima giila sa mga polis nga si Eduardo Piloto, 18, taga barangay Cansojong sa maong dakbayan , samtang ang mga suspetsado mao sila si Eugene Salibay ug Ricardo Paden Jr., pulos hingkod ug pulos taga Tangke.

Si Superintendent Henry Binas hepe sa kapolisan sa dakbayan sa Talisay mibutyag sa Banat News nga ang grupo sa biktima ug mga suspetsado daan nang nagkabangi.

Base sa ilang pasiunang imbestigasyon, nasayran nga ang grupo sa suspetsado, giatangan sa grupo sa biktima sa milabay'ng adlaw.

Maoy hinungdan nga agi'g panimawos, dihang nakit-an nila si Piloto, kagahapon, giluthang dayon kini ni Salibay apan wala kini maigo ug midagan paingon ngadto kang Paden.

Apan imbes tabangon, gibunalan na hinuon kini ni Paden og tubo hinungdan nga nahagba kini sa yuta ug wala na maglisod pagpusil si Salibay sa biktima.

Abi sa mga suspetsado nga patay na ang biktima, gibiyaan kini nga wala tiwasi ug misirit sila og panagan pahilayo sa maong dapit.

Gihatod dayon ngadto sa Vicente Sotto Memorial Medical Center sa dakbayan sa Sugbo ang biktima aron malibre gikan sa samad niya sa walang bahin sa lawas agi sa bala, ug mga bun-og agi sa tubo nga gipuspos kaniya.

Human sa hitabo, ang amahan ni Paden nga si Ricardo Sr. kinsa usa ka barangay tanod sa Tangke, nga nasayod sa nabuhat sa iyang anak, mao mismo ang mihatod ug mitahan niini ngadto sa kapolisan ug iya kining gitugyan kanila ni PO2 Lino Diez ug PO1 Estephen Sefuesca.

Si Paden malinawon na kaayo karon sa prisohan sa Talisay City detention cell samtang si Salibay padayon pang gipangita. - BANAT NEWS