CEBU, Philippines - Namatay ang usa sa duha ka managsuong nakuryentihan didto sa sitio Tulay, barangay Paknaan, dakbayan sa Mandaue sa miaging buntag.
Si SPO2 Roberto Hugo sa Mandaue City Police Office (MCPO) miila sa namatay nga si Jeffrey Guido, 18, samtang ang iyang igsoon nga si Jessie Guido, 12 , naangol.
Gibutyag ni SPO2 Hugo sa Banat News nga naglakaw sa karsada ang mga biktima dihang naagian nila ang lim-aw sa karsada diin natuslob ang buhing kuryente nga naputol .
Apan tungod sa ka-inosente sa mga bata ug wala hisayri nga makamatay ang tubig, ang manghod nga si Jessie nanghunaw sa iyang kamot.
Gumikan sa kakusog sa kuryente, dihadiha mikirig ang biktima, apan dihang nakita kini sa iyang maguwang nga si Jeffrey, gibira dayon sa naulahi ang kuryente ug tungod sa kusog nga pagkabira, mibaliktos ang tumoy sa wire sa iyang lawas nga maoy hinungdan nga nakuryentihan siya.
Gidala ang duha ka biktima ngadto sa Mandaue City Hospital diin gideklarar nga dead on arrival si Jeffrey.
Hinuon giangkon sa Super Concrete Construction ang kaakohan sanglit ang kuryente nga naputol gikan man sa poste sa suga sa maong establisamento.
Nasayran gikan kang SPO2 Hugo nga nasabod sa dump truck nga miagi sa maong lugar ang kuryente sa poste nga maoy nakaingon sa pagkaputol niini apan gipasagdan lang kini nga nagbitay ngadto sa yuta. - BANAT NEWS