59 ka mag-uuma sa Medellin nakadawat og yuta

CEBU, Philippines - Mokabat sa 59 ka mga mag-uuma sa barangay Canhabagat, lungsod sa Medellin ang bag-ohay lang nakadawat na sa ilang Certificate of Land Ownership Award (CLOA) gikan sa Department of Agrarian Reform recently.

Ang luna nga gibahin-bahin sa mga mag-uuma dunay gidak-on nga 114 ka ektarya nga gipanag-iya ni Genoveva Villalon.

Si kanhi maghuhukom Exaltacion Navarro nga mirepresentar sa mga Villalons nagkanayon nga kinasingkasing ang pagtugyan sa luna isip pagtuman sa balaud sa agraryo.

“If it took sometime before it was distributed to the farmers, it is because we want to go through the legal process,” sumala pa ni Navarro.

Si Flora Argawanon, usa sa mga mag-uuma emosyonal nga nipadayag sa ilang kalipay atubangan sa mga opisyal sa DAR ug sa iyang kaubanan.

Matud pa ni Argawanon nga nagtuo siya nga walay pulos ang maong programa ug nawad-an na siya og gana sa pagpaabot nga makaangkon og yuta.

Nangulo sa pagpangapod-apod sa CLOA mao sila si DAR-7 regional director Rodolfo Inson ug giabagan ni Cebu provincial agrarian reform officer Stephen Leonidas.

Si Kongresista Benhur Salimbangon nga maoy pinasidunggang dinapit napakyas sa pagtambong apan girepresentahan siya sa iyang manghod nga si Engr. Edwin Salimbangon.

Si Salimbangon ang nangulo sa ribbon-cutting sa pag-estalar sa mga mag-uuma isip mao na ang bag-ong mga tag-iya.

Gipahimangnoan ni Inson ang mga mag-uuma nga dili kalimtan ang ilang responsibilidad sama sa pagbayad sa buhis ug pagtikad sa yuta nga mahimong malamboon. - BANAT NEWS