Dugang holiday gisupak ni Mike
CEBU, Philippines - Dili pabor si Cebu City Vice Mayor Michael Rama sa mga balaudnon nga nag-ong-ong sa kongreso nga magdugang og mga holiday sa nasud.
Ang bise mayor nga mao usab ang chairman sa Cultural and Historical Affairs Commission (CHAC) niingon nga angayang tun-an sa kongreso ang maong mga proposal.
Kini tungod sa pagtuo ni Rama nga ang nahisgutang mga proposed measure maghatag og dakong epekto sa mga empleyado.
Partikular na niini ngadto sa mga contractual workers sa nagkadaiyang buhatan nga walay madawat nga sweldo kun walay trabaho.
Gipadayag ni Rama nga kung daghan ang mga adlaw nga dunay trabaho mas dakong bintaha ngadto sa mga trabahante.
Midugang ang bise mayor nga dako usab og mahatag nga impact ang pagdugang og mga holiday sa ekonomiya sa nasud taliwa sa nasinati karong financial crisis.
Lakip sa giplanuhang idugang nga mga holiday sa nasud mao ang Pebrero 4 isip Philippine-American War Heroes Day, Chinese New Year’s Day (movable date), Marso 18 isip Bangsa Moro Day, Marso 22 isip Emilio Aguinaldo Day, Hunyo 19 isip Jose Rizal Day, Nobiyembre 20 isip Children’s Day, ug Septiyembre 1 isip Filipino Family Day.
Alang kang Rama nga mahimo gihapong saulugon ang nahisgutang mga adlaw bisan kung kini dili madiklarar nga “red letter day”. - BANAT NEWS
- Latest
- Trending
