Pag-umangkon sa bise mayor sikop sa PDEA

CEBU, Philippines - Arestado ang usa ka kanhi bomberong pag-umangkon sa bise mayor sa dakbayan sa Lapulapu ug mga kaubanan atol sa gihimong buybust operation sa mga ahente sa Philippine Drugs Enforcement Agency (PDEA-7) niadtong Sabado sa alas 10:00 sa gabii sa sitio Sacred Heart barangay Gun-ob sa nahisgutang dakbayan.

Ang tigpamaba sa PDEA-7, Jessie Tabanao nga nahinabi sa Banat News miila sa dinakpan nga sila si Victor Amores, 42, giingong pag-umangkon ni Lapulapu City vice mayor Mario Amores, minyo, nagpuyo sa nahisgutang lugar ug gikatahong nag-awol isip bombero sa dakbayan.

Lakip sa nadakpan mao ang managsuong sila si Lala Dumatumao ug Mila ingon man si Josephine Borbon pulos taga barangay Bulacao sa dakbayan sa Sugbu.

Matud pa ni Tabanao, ang Special Enforcement Unit (SEU) sa PDEA-7 pinanguluhan sa hepe niini nga si Rayford Yap ug mga kaubanan maoy nakasikop kang Amores.

Gihulagway si Amores nga level 2 drug pusher diha sa dakbayan sa Lapulapu kinsa maoy mitunol sa duha ka paketeng shabu ngadto sa confidential agent nga poseur buyer.

Gikatahong si Borbon maoy midawat sa bayad ug si Amores maoy nagdala sa drugas nga gitunol niini sa poseur buyer samtang ang laing managsuong Dumatumao maoy mga lookout diha sa transaksyon.

Human sa pagdawat-tunol sa suspek daling gihamagan sa mga ahente sa PDEA ang upat ug dihang girekisa nakuhaan og dugang usa ka medium pack ug duha ka paketeng may sulod nga gituuhang shabu si Amores diha sa iyang bulsa.

Si Borbon ingon man managsuong Dumatumao pasakaan og kasong kalapasan sa section 26 sa R.A 9165 gumikan sa conspiracy samtang si Amores ang mag-atubang sa kasong pagpamaligya nga ubos sa section 5 sa RA 9165.

Si Tabanao nitug-an nga si Amores base sa ilang impormasyon maka-disposed og shabu dili mominos 200 gramos matag semana.

Dugang pa niini nga si Amores nadakpan na usab niadtong 2007 gumikan sa paghupot og illegal nga drugas apan nakagawas human maka-piyansa.

Apan samtang padulong nang mogawas sa lugar ang grupo ni Yap duna sila'y nadawat nga impormasyong dunay laing duha ka mga lalaking nanuyop sulod sa usa ka panimalay diha sa sitio Progress sa samang barangay hinungdan nga ilaha usab kining gisusi.

Tuod man naaktuhan sa mga ahente ang duha nga sila si Roberto “Intong” Tumulak, 42, uban ni Jeff Sildura, 33, ang duha gikatahong pulos usab level two drug pushers sa lugar.

Sila si Tumulak ug Sildura, nakuhaan og ubay-ubay'ng drug paraphernalia ingon man mga basiyo sa paketeng gidudahang gisudlan og shabu. -  BANAT NEWS