Suspek pagpusil sa tanod gipusil

CEBU, Philippines - Usa ka lalaking gitumbok nga namusil og barangay tanod ang napusilan usab diha sa baranagy Tupas lungsod sa Ronda niadtong sa milabayng adlaw’ng Biyernes.

Si Jeneper Yusores, alyas Edot, naigo sa bala diha sa walang abaga ug tuong bukton humam pusila ni Danny Landiza silingan niini sa nahisgutang lugar.

Base sa imbestigasyon sa Ronda police station, ang biktima nag-uban sa iyang asawa padulong moadto sa Ronda Police Station aron limpyohan ang iyang pangalan tungod sa pasangil nga siya maoy mipusil sa barangay tanod nga si Camilo Landiza niadtong petsa 12 sa Marso.

Apan wala sila makaabot sa police station human kini giatangan ni Landiza ug dayong gipusil makadaghang higayon apan nakadagan uban ang iyang asawa.

Ang suspetsado pagkakitang nakaikyas na ang duha nagdali sad kini sa pagpalayo sa dapit.

Ang biktima dali usab nga gidala sa Barili District Hospital apan wala madugay gilahos na kini sa Vicente Sotto Medical Center.

Matud pa ni SPO1 Jerome Rowil Llenos nga nahinabi sa Banat News nga ilang gisusi kun ig-unsa sa tanod ang suspek tungod kay pareho kini og apelyedo ug dako ang posibilidad nga managkaliwat kini.

Ang baranagay tanod nakaangkon og samad pinusilan sa walang bahin sa tuhod ug kasamtangan kining nagpaayo sa Barili District Hospital. - Lesley Caminade (BANAT NEWS)