'Hot meat' gisakmit diha sa terminal

CEBU, Philippines - Naghilak nga nagpakiluoy kagahapon atubangan sa mga sakop sa Operation Hot Meat sa siyudad sa Sugbu ang usa ka negosyante og karne gikan sa probinsya human masakmiti og walay inspeksyong mga karne.

Nagpakiluoy sa awtoridad si Alicia Dumdum molupyo sa lungsod sa Balamban human sakmita ang iyang dalang mga karne nga gisulod og mga sako diha sa South Bus Terminal tungod sa kapakyas pagpakita og meat inspection certificate.

Tungod niini, gikumpiskar sa awtoridad ang 40 ka kilong baboy, 30 ka kilong karne sa kanding ug upat ka buok manok-bisaya.

Matud pa ni City Veterinarian, Alice Utlang nga ila hinuong gibuhian ug gitugutang makalakaw si Dumdum apan kini pasakaan gihapon og tukmang kaso ugmang adlawa.

“Ato gyud ning tinud-on kay tingali og magtoo nang uban nga lugak ra kaayo ta dinhi sa siyudad nga bisan unsa na lang illegal ilang dalhon,” sumala ni Utlang.

Kalapasan sa meat inspection law ingon man sa meat regulatory ordinance sa dakbayan ang ipasakang kaso batok sa suspetsado.

Ang nahisgutang mga karne giingong itumod unta ni Dumdum sa usa ka kan-anan dinhi sa dakbayan nga gipasusi na usab ni Utlang.

Gipadayag sa city veterinarian nga dunay tulubagon ang tumuran sa nahisgutang mga karne tungod kay kini nidawat usab og hot meat.

Ang nasakmit nga karneng baboy gipahatod gilayon ni Utlang ngadto sa Cebu City Zoo ug gipalawog sa binuhing tigre.

Samtang ang ubang karne gipundo una sa buhatan sa city veterinarian ug sama sa gihapon, kini ipakaon sa nahisgutang hayop.

Gibutyag ni Utlang nga di lang kini maoy unang higayon nga may gisakmit silang mga karneng wala inspeksyon apan ang nakuha gikan kang Dumdum giingong maoy labing daghan.

Gitataw ni Utlang nga hugot nilang gimonitor ang mga karne nga itumod dinhi sa siyudad aron sa pagsiguro nga kini luwas kan-on sa mga konsumidor. -  BANAT NEWS