Drug pusher tiklo uban sa 7 ka paketeng shabu

CEBU, Philippines - Arestado ang usa ka lalaking gipasanginlang drug pusher human masakmiti og pito ka paketeng gidudahang may sulod nga shabu diha sa barangay Gun-ob, dakbayan sa Lapulapu atol sa buy bust operation sa kapolisan.

Ang nadakpan mao si Roderick Inoc, 22, taga sitio Balanghoy sa barangay Gun-ob sa maong dakbayan human mapaliti og shabu sa grupo ni Insp. Junnel Caadlawon.

Ang suspek dugay nang gipanid-an sa kapolisan sulod sa pipila ka mga adlaw tungod sa impormasyong mao kini tigbaligya og shabu sa maong dapit.

Usa ka police decoy nga nagpakaaron-ingnon nga tiggamitan og shabu ang mipalit sa suspek ginamit ang marked money ug human itunol sa suspek ang usa ka paketeng shabu gidiretso kini og signit.

Sa pagrekisa sa bulsa niini nakuha usab ang laing unom ka paketeng shabu ug P500 nga salaping gidudahang halin niini sa drugas. (BANAT NEWS)