3 angol kay gidasmagan sa sakyanan sa polis

CEBU, Philippines - Tulo ka mga pasahero sa traysikad ang nangaangol human madasmagi sa polis nga luwan sa iyang multicab diha sa lungsod sa Cordova sa kagahapon sa kaadlawon.

Si PO1 Lauro Laurel sa Cordova Police Station nga nahinabi sa Banat News kagahapon miila sa mga nangaangol mao sila si Antonio Aresgado, 31, Milven Inot, 18 ug Henry Inot, 22, pulos taga barangay Pilipog sa nahisgutang lungsod.

Ang nakadasmag kanila mao si PO1 Arnel Resente nga nadestino sa Cordova Police Station kinsa gikan pa nga nagtubag og alarma sa usa ka disco sa maong dapit alas 4 pasado ang takna sa miaging kaadlawon.  

Matud pa ni PO1 Laurel nga gikan sa ilang panimalay ang mga biktima paingon sa Poblacion dihang nadasmagan ni PO1 Resente.

Nakabaton og mga pangus ug bun-og sa kalawasan ang mga biktima hinungdan sa pagkalandig sa Lapulapu District Hospital. (Romeo Limpangog)   (BANAT NEWS)