Amot sa graduation ipa-report

CEBU, Philippines - Giawhag ni Department of Education regional director Recarido Borgonia ang publiko ilabi na ang mga ginikanan nga mo-report direkta sa ilang buhatan kun makamatikod kini nga dunay mga magtutudlo sa publikong tunghaan nga mangolekta og amotan nunot niining nagsingabot nga graduation karong bulana.

Si Borgonia mitug-an sa Banat News nga iya nang gipadad-an og kopya sa direktiba gikan ni Education Secretary Jeslie Lapuz ang tanang division superintendent dinhi sa Central Visayas alang sa pagpahigayon sa yano ug simple nga graduation karong tuiga.

Kini gitumong aron makadaginot ang mga ginikanan taliwala sa nasinati karong kalisod epekto sa nasinati nga kalibutanong krisis sa ekonomiya.

Matud sa direktor mas mopabor pa sila nga dili mag toga ug pasul-obon lang sa uniporme sa eskuwelahan ang mga tinun-an atol sa graduation rites niini makadaginot lang sa gastuhan ang mga ginikanan.

Mipasidaan ang direktor nga ipaubos nila sa subsob nga imbestigasyon kadtong mga magtutudlo sa tunghaan nga ireklamo nga mipapugos og pa amot sa mga ginikanan alang sa graduation ug pahamtangan nila og silot kun mapamatud-an.

Giklaro ni Borgonia nga kun duna man gani ginagmay nga amotan nga masabutan sa mga sakop sa Parents and Teachers Association (PTCA) gikinahanglan nga ang PTCA ang mangolekta niini ug dili ang mga magtutudlo o prinsipal kay supak kini sa direktiba.   (Rey Pasaporte)   (BANAT NEWS)