Patay sa 4th distrito angay susihon

CEBU, Philippines - Nabalaka si kanhi kongresista ug karon mayor sa dakbayan sa Bogo, Mayor Celestino Martinez, Jr. sa dagkong krimen nga nahitabo sa ika-upat nga distrito ug hangtud karon wala pa gayud kini kasulbaran.

Usa sa gihulagway ni Martinez nga patay nga hangtud karon wala gayud masulbad mao ang negosyante nga si Renerio “Gogong” Arrogante III.

Si Mayor Martinez usa sa namulong sa miaging adlaw sa sumad nga usa ka tuig nga pagpatay ni Gogong Arrogante.

Matud pa ni Martinez nga angayan na gayud masusi ang pagpatay ni Gogong ug uban pa nga hangtud karon wala gayud masulbad.

Samtang si Mayor Rogelio Illustrisimo Sr. sa lungsod sa Santa Fe gipatay didto sa haduol sa Kapitolyo panahon sa kampanya sa 2007, apan kini kabahin gihapon sa mga panghitabo sa ika-upat nga distrito.

Usa ka Antonio Cometa ang gipatay sa tuig 2004 nga piniliay apan hangtud karon wala pa gayud hustisya ang iyang kamatayon.

 Gipasumbingay ni Martinez nga ang taga lungsod sa Daanbantayan nahibawo na sa utok sa krimen, apan ang pagpalig-on lamang sa ebidensya niini.

Naghilak atubangan sa dul-an sa 600 ka mga mulopyo didto sa gilubngan sa negosyante sa Balingasag si Juliet miingon nga dili gayud sila muhunong hangtud dili makabaton og hustisya ang pagpatay sa iyang bana.

Ang igsoon ni Gogong nga si Rosalina Arrogante nga gikan pa usab sa nasud sa Australia miingon nga ang kamatayon ni Gogong makapabuka sa mga mata sa katawhan sa Daanbantayan nga dugay na gayud nga gipaantos sa mga tawo nga maoy gipalabi ang personal nga interes.

 Si Gogong gipatay atubangan sa iyang asawa nga si Juliet ug anak nga si Renren niadtong sayo sa buntag sa miaging Marso 9, 2008 didto sa ilang patigayon sa barangay Poblacion sa lungsod sa Daanbantayan. (Pepe Sollano) (BANAT NEWS)