Police trainee gipamabdosan sa trainor gisusi

CEBU, Philippines - Padayon karon ang gihimong pagpanghipos og ebidensya sa mga imbistigador sa National Police Commission (NAPOLCOM) pagtino sa kabalido sa report batok sa usa ka police trainor nga nakapamabdos sa iyang policewoman trainee didto sa PNP Regional Training School sa barangay Apas nga nabulgar karong bag-o.

Gibutyag ni NAPOLCOM-7 regional director Bernardo Calibo sa dihang nahinabi sa Banat News nga kagahapong adlawa gipabalik niya ang duha ka mga imbistigador pagpanghipos og dugang kasayuran sa ubang mga police trainee nga ka-batch sa maong policewoman human wala kaayo kini makahigayon sa pagsukitsukit niadtong miaging adlaw sa dihang nabulgar ang maong kontrobersya tungod kay naatol usab kini sa graduation sa maong mga trainee.

Matud ni Calibo nga ila unang tinuon ang kabalido sa maong panghitabo human dunay susamang kontrobersya sama niini kaniadto sa dihang dili pa siya ang direktor sa NAPOLCOM dinhi sa Central Visayas apan nadiskobrehan sa gihimong pakisusi nga usa lang ka black propaganda.

Hinuon pabiling gipugngan ni Calibo ang mga ngalan sa maong police trainor ug policewoman trainee nga nadestino na karon sa usa sa mga police station dinhi sa dakbayan pending sa gipahigayong imbestigasyon.   Giklaro hinuon sa direktor nga walay problema kun ugaling tinuod ang maong panghitabo unya pulos walay kabilinggan sa kinabuhi ang maong police trainor ug policewoman unya kabubut-on nila ang paghinigugma-ay ug walay pinugsanay.

Gipasalig hinuon sa direktor nga walay whitewash ang gipahigayon nila nga imbestigasyon ug gipasalig niini nga ipalutaw gyud kun unsa man ang tinuoray nga panghitabo.

Paningkamotan sa NAPOLCOM nga makumpleto ang imbestigasyon sulod ning semanaha. (Darrel A. Carumba)   (BANAT NEWS)