CEBU, Philippines - Nagtingkagol sa karsel sa kapolisan ang duha ka lalaking gipasanginlang nangilad sa iyang ig-agaw’ng Overseas Filipino Worker ginamit ang usa ka gold bar sa miaging adlaw sa usa ka kan-anan diha sa barangay Talamban.
Si Restituto Tabal, usa ka OFW ug lumolupyo sa barangay Guba ning dakbayan giilad sa iyang ig-agaw’ng si Roselo Requinto ug sa higala niining si Rex Bracero pulos taga sitio Pooc dakbayan sa Talisay.
Ang biktima midangop sa Investigation and Detection Management Bureau (IDMB) human wala na mobalik ang duruha nga iyang gibayran og P115,000.
Ang biktima misaysay nga giduaw siya ni Requinto ug mihisgot nga duna kini kailang namaligya og gold bars apan di kini ihatag kun dili fully paid.
Si Bracero midala og usa ka gold bar, ug aron motuo ang biktima nga tinuod kining bulawan mibuak si Bracero og usa sa mga gold bar ug gipahuwam sa biktima aron ipatan-aw sa pawnshop.
Si Tabal tungod sa kahinam nga maangkon ang maong bulawan wala maglangay ug nagpakuyog sa iyang igsuon ngadto sa usa ka pawnshop ug giingong didto napamatud-ang bulawan.
Sumala pa ni Bracero nagkantidad ang usa ka bar og usa ka milyon, ang biktima mibayad og P115 mil sa duha isip partial payment ug misaad nga ihatud kaniya ang bulawan alas 12 sa udto..
Diha na magduda si Tabal nga giilad siya sa duha tungod kay milapas nalang ang maong oras nga gisaad wala mopakita kaniya ang duha hinungdan nga misumbong siya sa kapolisan.
Sa pagsukit-sukit sa kapolisan ang duha pulos mihimakak nga ilaha ang maong bulawan kundili mihingalan sa usa ka Jerry Mariquit nga maoy tag-iya niini ug misugo kanilang ibaligya kini.
Ang duha gikatakdang pasakaan og estafa samtang gipangita pa usab si Mariquit nga maoy giingong gitunulan sa duha sa kwarta sa biktima. (Lesley Caminade) (BANAT NEWS)