Mga tulisan sa Fooda nailhan na

CEBU, Philippines - Nailhan na sa kapolisan sa dakbayan sa Sugbo ang mga tulisan nga mitulis sa Fooda Savers Mart niadtong Lunes sa kaadlawon diha sa barangay Camputhaw diin gisakiyo niini ang P100 mil   nga mga sensiyo.

Ang hepe sa kapolisan sa dakbayan sa Sugbu Sr. Supt. Patrocinio Comendador nagkanayon sa mga tigbalita nga duna na silay mga ngalan sa ubang mga tulisan nga kaubanan sa walo ka mga tulisan

Apan hangtod ning mga higayona dili pa gyud nila mabutyag ang mga ngalan niini hangtod nagpadayon pa ang ilang imbestigasyon ug pagpangita kanila.

Subay niini, giklaro niya nga bisan tuod kun nahagbong sa lie detector test ang usa sa mga security guard apan dili pa nila makonsiderar kining suspek, kun dili makatabang kini sa imbestigasyon sa pagtumbok sa mga suspetsado.

Samtang duna usa'y ubang mga hinungdan kun nganong nahagbong sa polygraph test ang usa sa mga sikyu hinungdan nga gitun-an pa kini sa mga imbestigador, lakip na ang pagsuta sa background niini.  (BANAT NEWS)