Bacquerfo maabswelto - Atty. Archival

CEBU, Philippines - Masaligon ang kampo ni Tudela mayor Rogelio Bacquerfo nga ibasura ang kasong malversation of public funds nga giatubang niini sa Sandiganbayan.

Matud ni Atty. Noel Archival, abogado ni Bacquerfo, binuang ang maong kaso ug may bulok politika hinungdan nalutsan og warrant of arrest ang iyang kliyente maong niadtong Martes bulontaryong mitahan si Bacquerfo sa Police Station sa Tudela human mahibaw-ing duna siya’y WOA.

Midepensa si Archival nga dili tinuod nga gigamit ni Bacquerfo sa personal nga katuyoan ang P250 mil gikan sa Presidential Management Staff (PMS).

Kini tungod kay gipamalit kini og semento sa lungsod ug gigamit alang sa Clean and Green Program sa kabarangayan, apan tungod sa kalangay pag-abot sa maong pundo kaugalingong kwarta una ni Bacquerfo maoy gigamit. Dihang migawas na ang maong pundo mao kini giilis sa personal nga salapi sa iyang kliyente.

Matud ni Archival magpaabot nalang sila sa hearing sa kaso aron ilang i-presentar ang ilang mga ebidensya nga magpakaway-sala sa iyang kliyente. Sa nasayran si Bacquerfo gi-release dayon sa korte niadtong Miyerkules pasado alas 10 sa buntag human makapiyansa og P40 mil usab sa sala ni RTC judge Mendrado Paredes ang release order.

Ang laing niangkon nga mayor sa maong lungsod mao si Demetrio Granada kinsa maoy mipasaka sa maong kaso batok kang Bacquerfo tungod sa pagdudang wala kini ipalit og semento ug giingong gigamit sa personal nga katuyoan.   (Rey Pasaporte)   (BANAT NEWS)