Magtiayong NPA mitahan

CEBU, Philippines - Boluntaryong mitahan ang magtiayong gidudahang sakop sa New Peoples Army (NPA) kagahapon sa opisina sa mayor sa lungsod sa Catmon nga si Mayor Estrella Aribal.

Ang kakapoy, kalisod, kagutom, walay puas nga paggukod sa militar ug ingon man kaugmaon sa ilang mga anak maoy girason sa magtiayong Aurelio, 53, ug Merlinda Botilla, 39, nga motahan.

Ang magtiayon maoy squad leaders sa Section Committee Two nga nagbase diha sa amihanang bahin sa lalawigan, sumala pa sa militar.

Ang duha gikuyogan nila Mayor Estrella, CCPO Director Sr. Supt Carmelo Valmoria, Central Command deputy commander, Gen. Jessie Dellosa ug Lt. Col. Raymundo Bañares, pangulo sa 78th IB sa Philippine Army sa buhatan ni Gobernador Gwendolyn Garcia kagahapon sa udto.

“I am appealing now to my other comrades to also surrender. I’m doing this for my family,” matud pang Aurelio kinsa dunay tulo ka mga anak nga nagpangidaron pa og 9, 6 ug usa ka tuig ug tunga.

Gibutyag ni Aurelio ang ilang kamagulangang anak wala gyud makapadayon sa pag-eskuyla tungod sa ilang kalihokan sa bukid.

Si Aurelio nagpasakop sa maong pundok sa NPA niadtong 1991 diha sa iyang lungsod sa Catmon tungod sa pagpangabuso sa nabungkag nga Philippine Constabulary (PC). Si Aurelio nagkanayon nga diha sa kalihukan niya mapalgi ang asawa karon ug sa bag-o pa nakauyon gyud silang magtiayon sa kalihukan apan nalamdagan sila sa paglabay sa katuigan nga walay kaayuhang nakuha sa kalihukan.

Karon silang duha dunay kasong murder sa Branch 25 sa Danao City sa Regional Trial Court may labot sa pag-atake sa detachment sa army niadtong 2002 sa lungsod sa Carmen nga miresulta sa kamatayon sa upat ka sundawo.   (BANAT NEWS)