Basak-Pardo gidayeg sa PDEA

CEBU, Philippines - Gipasidunggan kagahapong adlawa sa Philippine Drug Enforcement Agency (PDEA-7) ang pipila ka opisyal ug mga tanod sa barangay Basak, Pardo ning dakbayan sa Sugbu.

Kini tungod usab sa giingong subsob ug tinud-anay nga kampanya niini batok sa ginadiling drugas diha sa nahisgutang barangay.

Mitunol sa pasidungog mao sila si PDEA-7 Director Randy Pedroso, DILG Undersecretary Lito Ruiz ug DDB Vice Chairman Attorney Clarence Paul Oaminal.

Matud ni Oaminal nga angayan lang nga pasidunggan ang mga tanod ug opisyal sa Basak Pardo tungod sa seryoso niining kampanya batok sa ilegal nga drugas.

Kini sama sa regular nga pagpahigayon og mga checkpoint, saturation drive ug ubang anti-drug campaign nga gipatuman sa barangay.

Subay niini, giawhag ni Oaminal ang ubang kabarangayan ilabi na dinhi sa dakbayan nga mosunod sa lakang nga gihimo sa Basak, Pardo.

“Manghinaot ko nga ang tanang barangay mosunod sa gihimo sa Basak, Pardo pagpahigayon og mga checkpoint, saturation ug uban pa,” sumala ni Oaminal.

Nasayran gikan kang kapitan Dave Tumulak nga ubay-ubay na ang ilang napasakang kaso ngadto sa korte may kalabutan sa ginadiling drugas.

Kini tungod sa mga pakete sa shabu, marijuana, nubain, rugby ug uban pa nga ilang nasakmit gikan sa mga suspetsado.

Mapasigarbohon si Tumulak sa ilang gihingusgang anti-drug campaign, tungod kay giingong wala nay drug pusher sa ilang barangay.

Sa samang higayon gipasalamatan usab sa kapitan ang mga mulopyo sa Basak, Pardo tungod sa kooperasyon nga gihatag niini sa ilang mga kalihukan.  - Elly Bolonos (BANAT NEWS)