CEBU, Philippines - Kritikal ang kahimtang sa usa ka batan-ong lalaki kinsa gipusil sa ulo sa tulo ka sakop sa Crips gang didto sa sitio Kagudoy sa barangay Basak, dakbayan sa Lapulapu kagahapon.
Ang biktima mao si Alexes Bancali, 23, samtang ang mga suspek mao sila si Sim Jack Badayos, Engelbert Versoso ug Lester Fuentes nga pulos hingkod , nga taga Kagudoy.
Si PO1 Junel Mayola sa homicide section sa kapolisan sa maong dakbayan miingon nga naglakaw ang biktima paingon sa usa ka internetan dihang gipusil kini sa mga suspetsado nga nagsakay og motorsiklo.
Dugang pa niya nga pipila na ka adlaw nga nagpangita ang mga suspetsado sa biktima ug nataymingan kini kagahapon sa iyang paggawas sa ilang balay.
Gihatod dayon ang biktima ngadto sa sa Lapulapu District Hospital apan gibalhin kini sa Vicente Sotto Memorial Medical Center sa dakbayan sa Sugbo gumikan sa katalandugon sa iyang kahimtang.
Samtang ang mga suspetsado nga nakasibat padayon pang gipangita karon sa kapolisan. Nailhan sila pinaagi sa usa ka saksi. – BANAT NEWS