Compostela nag-una sa tax collection

CEBU, Philippines - Nag-una ang kagamhanan sa lungsod sa Compostela sa laing 43 ka mga lungsod sa tibuok probinsya sa Sugbo sa real property tax collection sa tuig 2008.

 Si Provincial Treasurer Roy G. Salubre sa giluwatang report niini mibutyag nga ang lungsod sa Compostela adunay kinatibuk-ang koleksyon nga mokabat sa P11.9 milyones, samtang ang target nilang kolektahunon sa maong tuig P6.2 milyones ra.

 Gipahibawo ni Salubre nga ang kagamhanan sa lungsod sa Compostela adunay 193.2 porsiyento nga efficiency sa ilang target collection.

 Gisundan ang lungsod sa Compostela sa lungsod sa Poro nga mikolekta og P2.8 milyones, gikan sa ilang target collection nga P2.2 milyones.

 Samtang ang mga lungsod nga nalakip sa napulo ka maayong nangolekta sa ilang buhis mao ang lungsod sa Alcantara,Tudela, Santa Fe, Medellin , Argao, Balamban, Santander ug Sibonga.

 Si Mayor Ritchie R. Wagas sa iyang reaksyon mipadayag sa iyang kalipay sa lain na usab nga kalamposan nga nakab-ot sa lungsod sa Compostela.

 Matud pa ni Mayor Wagas nga kini resulta sa panagtambayayong sa mga empleyado ug katawhan sa lungsod sa Compostela.

 Gani ang lungsod sa Compostela nga giklasipikar nga fourth class nga lungsod, nahimo na karon nga 3rd class nga lungsod.

 Midugang ang mayor nga sa pagka karon maoy iyang nakita nga nagsugod na ang katawhan sa lungsod sa pagpahimulos sa bunga sa ilang paningkamot nga gisugdan niya sa tuig 2007 sa dihang siya milingkod pagka mayor sa maong lungsod. – PR (BANAT NEWS)