"Drastic action" gipaabot

CEBU, Philippines - Gikalipay sa pamilyang Burden ang pagbalik ni Mayor Tomas Osmeña dinhi sa Sugbu human sa pipila ka buwan nga pagpaubos niini og chemotherapy sa Estados Unidos.

Malaumon si Rowena Burden, inahan ni Kimberly Therese Burden nga mahatagan og kasulbaran sa mayor ang nahitabong kontrobersiya pagpahigayon sa Miss Cebu 2009 sa miaging buwan sa Enero.

Si Kimberly Therese Burden ang napiling Miss Cebu 2009 2nd runner-up ug maoy nidaug sa texters’ choice award sa nahisgutang beauty pageant apan nabulabog ang paghatag sa maong special award dihang laing kandidata ang gitawag ug gitunulan niini ug dili si Kimberly.

Butang nga dili madawat sa pamilyang Burden ingon man sa mga higala ug dumadapig niini hinungdan nga sila niprotesta.

Sa gipahigayong imbestigasyon ang Cebu City Tourism Commission (CCTC) sa kontrobersiya gimandoan ang mga hingtungdan sa pagpangayo og pasaylo sa mga Burden apan wala matagbaw niini ang pamilyang Burden sa resulta niini.

Kini ang hinungdan nga nipatunga si City Administrator Francisco Fernandez ug nipadangat sa kontrobersiya ngadto kang Mayor Osmeña.

Gipahibawo ni Fernandez ngadto sa pamilyang Burden nga ang mayor mohimo og “drastic action” sa pageant organizers sa pagbalik niini dinhi sa Sugbu.

Karon nga nahibalik na ang mayor nagplano si Dr. Burden pagpakighinabi og usab kang Fernandez aron sa pagpangumusta sa maong “drastic action.”

Una nang gipadayag sa doktora nga gusto nilang tangtangon ang Miss Cebu project chairperson nga si Philip Rodriguez; CCTC secretariat nga si Cinbeth Orellano ug ang marketing consultant sa komisyon nga si Bruce Bollozos.