CEBU, Philippines - Patay nang nakit-an sa mga silingan ang usa ka mag-uuma sulod sa pinuy-anan niini nga nabulit og samad dinunggaban sa kalawasan ug ang ulo gidakdakan og dakong bato diha sa balay niini sa sitio Ilaya Poblacion-3 siyudad sa Carcar kagahapon sa alas 7:00 sa buntag.
Ang biktima mao si Maximo Urdañiesa Lombra, 59, lumad nga taga sitio Langob, barangay Mangyan, Sibonga apan anaa na magpuyo sa maong lugar alang sa panguma.
Matud pa ni PO1 Alex Buanghog sa Carcar City Police dihang nahinabi sa Banat News ang biktima nakit-an nalang sa iyang mga silingan nga nagbuy-od na nga wala nay kinabuhi sulod sa payag.
Atol sa pakisusi nasuta nga ang biktima nakaangkon og samad dinunggaban sa tuong bahin sa iyang totoy ug dakung samad sa agtang nga maoy hinungdan sa kamatayon niini.
Naka-recover og kutsilyo nga nagkadugo ang kapolisan diha tupad sa patay'ng lawas sa biktima nga maoy gituohang gigamit sa suspek ug upat ka mga dagkong batong nagkadugo gihapon diha sulod sa payag nga gituohan usab nga gigamit pagdakdak sa ulo sa biktima.
Gibutyag sa pipila ka mga silingan ngadto sa mga polis nga ang biktima nakit-an nila nianang pagkagabii nga hubog nang mipauli, wala usab kini kontra sa ilang dapit.
Ang kapolisan padayon pa sa ilang imbestigasyon pagtumbok sa suspek o mga suspek samtang gitakdang ipaubos sa autopsy ang patay'ng lawas niini. - Darrel Carumba (BANAT NEWS)