$10,000 gidonar sa barkong midaro sa Lagundi Reef

CEBU, Philippines – Shipping agency nga maoy agent sa barkong M/V United Majuro nga midaro sa Lagundi Reef mitunol og $10,000 isip donasyon sa danyos nga nahimo niini niadtong milabay'ng semana.

Kini bisan paman sa depensa sa mga abogado sa kapitan sa M/V United Majuro nga ang Lagundi Reef sa dakbayan sa Talisay wala sa navigation charts nga gipanggamit karon sa mga international shipping companies.

Si Atty. Rizza Marie Mangubat ug Atty. Gina Guinto, mga abogado sa kapitan nga si Chen Guangming, 39, nagkanayon gawas nga wala sa navigational chart, wala usab kini visible nga boya aron makit-an sa layo pa.

Apan ang mga divers nga maoy nag-atiman sa maong gasang midepensa nga duna gyuy boya ang maong dapit ug nianang nasangad ang barko naatol kini nga tua sa ilawom ang mga divers ug nag-ilis sa naguba nang karaang boya.

Si Guinto nagkanayon nga may clearance sa customs, Coast Guard ug sa Philippine Ports Authority niadtong tungora nga makalarga ang maong barko ug naghuwat ra kini sa mapa sa pagbalik niini ngadto sa Indonesia.

Kagahapon sa buntag ang maong mga abogado uban nila ni Raul Gallope ug Robert Aurelio, mga Assistant Operation Managers sa Wallem Ship Agencies mitunol sa $10,000 nga donasyon alang sa rehabilitasyon sa fish sanctuary.   

Kagahapon sa buntag si Mayor Socrates Fernandez ug city legal officer ang milagda sa deed of donation apan wala kini magpasabot nga ang dakbayan dili mopadayon sa pagpasaka og kaso batok kang Chen kabahin sa insidente.

Ang mga abogado ni Chen ang nagkanayon nga duna silay nakitang kalapasan tungod kay ang ilang kliyente gidetiner sulod sa 48 ka oras nga wala man kini magdumili sa pagbayad og multa og P5 mil.

Ug base sa ordinansa sa dakbayan P5 mil lang ang maximum nga penalty sa nahimong kalapasan.

Ang nahisgutang mga abogado ang midugang nga niadtong Sabado pa nila gidala-dala ang nahisgutang donasyon ug desidido gyung ihatag sa dakbayan isip pagpakita sa ilang pagkamatinud-anon nga ma-rehabilitate ang gasang. –BANAT NEWS