Drivers nag-'silent protest' sa LTO

CEBU, Philippines – Nakakuha’g gamay’ng kahayag ang mga drivers nga nag-presentar sa nagkalain-laing rota dinhi sa dakbayan ug sa Metro Cebu human sa ilang pakig-dialogue sa pangulo sa Land Transportation Office-7 kagahapon sa buntag.

Sa pakighinabi sa Banat News kang Tony Pugado kanhi chairman sa Nagkahiusang Drayber sa Sugbu (NADSU) ug maoy nag-representar sa gibana-banang 300 ka drivers sa lain-laing rota uban sa transport groups sa maong silent protest nagkanayon nga may gamay'ng alibyo sa ilang problema nga gisaad si LTO-7 Raul Aguilus.

Ang mga driver misupak sa kadagko na karon sa bayranan tungod kay ang kamandoan magpugos kanila pagpabayad sa mga multa sa karaan nilang violations kun mo-renew og lisensya.

Sa bag-ong kamandoan gikatahong makabayad sila hangtud P5,278 kun sila matiketan katulo ka higayon tungod sa mga traffic violations atol sa ilang pag-renew o ba kaha paglukat sa ilang lisensya imbes P1,278 ra sa wala pa ipatuman ang bag-ong kamandoan sa multahan sa LTO.

“Base sa bag-ong multa ang first offense dunay P1,278 nga multa; second offense P1,500 ug katapusang offense P2 mil ug ang succeeding offense moabot na ngadto sa P5 mil,” pasabot pang Pogado.

Sa gihimong dayalogo kagahapon si Pogado gipasaligan ni Aguilos nga dili na ang computer maoy moisyu og resibo sa higayon nga dunay molukat nga driver sa iyang lisensya.

“Automatic man gud P5 mil ang mogawas sa resibo basta computer ang moisyu himuan nila og manual ang pag-isyu sa resibo ma-emphasized man didto kun first offense pa ni. Kay kun computer gud centralized baya na, modako gyud,” matud pang Pogado.

Para kang Pogado bug-at ra kaayo ang maong kantidad sa mga drivers ug dunay dako kaayong epekto niini ngadto sa ilang mga pamilya.

Si Aguilos dihang gihinabi sa Banat News miklaro nga padayon ang pagpatuman sa kamandoan sa LTO sa bag-ong multahan tungod kay wala siya'y gahom aron kini ipahunong.

Sa sayo pa, ang vice-chairman sa Nadsu Ruben Rama mipasangil nga silang mga PUJ drivers mao ray gituyoan niining bag-ong multahan.

Apan si Aguilos mipasabot nga wala gibutang sa maong balaod nga kadto rang driver sa PUJ maoy tumong niini kundili lakip na pribadong mga sakyanan basta makalapas sa lagda sa trapiko.

“Tanan drivers PUJ ug private, nag-operate og kolorum nga sakyanan, walay driver’s license, basta tanang violations” pasabot pang Aguilos.

Gihangyo usab ni Aguilos ang mga PUJ drivers ug sa pribadong sakyanan likayan gyud nga makalapas sa lagda sa trapiko tungod kay isip tabang niya sa mga drivers misugot siya sa hangyong i-manual lang ang pag-isyu og resibo niadtong molukat sa lisensya aron dili maapil kadtong karaang violations ug iya kining ipaabot ngadto sa ilang ulohang buhatan. –BANAT NEWS