2 ka laborer naghuramentado gitigbas

CEBU, Philippines -  Duha ka mga laborer ang gipangtigbas sa ilang silingan human usab mag-huramentado tungod kay pwerteng huboga atol na sa likud-likud sa kasal sa ilang silingan niadtong Sabado sa alas 10:20 sa gabii sa sitio Tigao-Tigao, barangay Cansuhi, Argao.

Ang nalandig sa tambalanan mao sila si Jimmy Oblianda, 23, nakaangkon og duha ka samad tinigbasan sa iyang nawong nga napurmag ‘X’ ug Sonny Nasibog, 26, natigbasan sad sa walang bahin sa nawong ug duha ka mga kamot.

Samtang ang suspetsadong nagmaoy mao si Armand Algones, hingkod ang panuigon, way tarong trabaho kinsa wala na maabti pa sa mga barangay tanod ug kapulisan nga miresponde.

Si PO1 Benjamin Herosaga sa Argao Police Station nga gikahinabi sa Banat News mitug-an nga ang mga biktima ug suspetsado nag-inom pang daan sa wala pa mahitabo ang pagpanigbas.

Ang silingan nilang si Rustico Tegolo Jr. kinsa kaslunon ug naglikud-likud niadtong higayuna maoy miimbitar kanila apan dihang nahubog na ang suspek kalit kining mipunit og sundang ug gitigbas ang silingang si Luciano Belia.

Apan giswerte si Belia kay wala kini maigo ug nakadagan apan ang biktimang si Oblianda pagkakita sa gihimo sa suspek daling miulang kaniya apan kini hinuoy giatubang ug gitigbas sa makaduha ka higayon diha sa nawong sa suspek.

Si Nasibog misuway pagkumbinser kang Algones nga hunungon na ang gihimo niini apan inay mopatuo siya naman usab ang giatubang niini ug gitigbas usab.

Dugang nakuhang impormasyon sa kapulisan nga si Algones kanunay nang magmaoy ug mangitag away kun makainom.

Kasong double frustrated murder ang ilang giandam nga ipasaka karong adlawa human usab ang mga biktima ang disedo gyud nga mopasakag kaso batok   niini. - Guam Logroño (BANAT NEWS)