Misulay'g lugos sa babaye napriso

CEBU, Philippines -  Nagtingkagol sa Talisay City detention cell ang usa ka 28-anyos nga lalaki human kini misulod sa usa ka balay ug giingong misuway sa paglugos sa usa ka babaye kagahapon sa kaadlawon diha sa Bliss, barangay Lawaan III, dakbayan sa Talisay.

Ang giingong gisuwayan og lugos mao si Christina Rosacena, 30-anyos, usa ka separada nga nagpuyo sa panimalay ni Protacia Sayson, 67, biyuda, parehong residente sa maong lugar.

Ang suspetsado giila sa mga polis nga si Oriven Salatandre, ulitawo, taga sitio Cadicay sa maong barangay.

Base sa imbestigasyon sa mga polis nga si Salatandre ang misulod sa balay nga walay pananghid ug midiretso sa kuwarto ni Rosacena sa ikaduhang andana ang .

Si Salatandre ang gipasanginlang miguba sa bintana sa ubos nga bahin sa balay diin siya miagi paingon ngadto sa sulod.

Gikataho nga buot untang among-amongan ni Salatandre si Rosacena apan nakadagan kini gawas sa iyang kwarto ug nakapangayo og panabang.

Sila si PO2 Narciso Alforque, PO1 Jonathan Largo, PO1 Julio Canolas Jr. ug PO1 Arji Javier ang daling miresponde sa maong insidente ug misikop sa suspetsado.  - Brenda D. Batuto (BANAT NEWS)