Sumad sa pagpatay ni Gogong, way hustisya

CEBU, Philippines -  Moabot na sa usa ka tuig karong adlawa, Marso 9 human patya ang negosyante nga si Renerio “Gogong” Arrogante III, ang iyang mga kahigalaan ug kabanay sa lungsod sa Daanbantayan padayon nga nanawagan sa hustisya sa iyang kamatayon.

Karong adlawa, usa ka misa pasalamat himuon isip halad kang Gogong Arrogante nga himuon sa gilubngan sa negosyante didto sa Balingasag, barangay Bitoon sa maong lungsod.

Usa ka programa ang himuon sa hapon diin gipaabot nga mamulong si Mayor Celestino Martinez Jr. sa dakbayan sa Bogo ug mga kahigalaan ni Arrogante. Gipaabot usab nga mohatag og pamahayag ang kabanay ni Arrogante pinaagi sa iyang asawa nga si Juliet.

Si kanhi Bise Mayor Mariano “Nieve” Diaz mihulagway nga si Gogong Arrogante usa ka bayani sa katawhan sa lungsod sa Daanbantayan.

Matud pa ni Diaz nga ang nahitabo nga pagpatay ni Gogong Arrogante nakapahigmata sa mga molupyo sa Daanbantayan nga kaniadto nagpakahilom ug dili manginlabot sa kalihukan sa lungsod.

Nagkanayon si Diaz nga padayon sila nga nanawagan sa hustisya sa linuog nga pagpatay kaniya.

Gihagit sa kanhi bise mayor ang mga awtoridad nga himuon ang dinalian nga kasulbaran sa maong kaso.

Samtang si Engr. Augosto “Dodong Itok” Corro nga suod nga higala ni Gogong mihagit sa kapolisan ug mga opisyal sa lungsod nga mopakita og interes sa kaso alang sa dali nga kasulbaran.

Matud pa ni Corro nga ang katawhan sa lungsod nasayod nga usa ka “politically motivated” ang pagpatay ni Arrogante.

Nabalaka si Corro nga ang kaso ni Gogong malakip sa listahan sa mga kaso nga nahitabo sa lungsod nga wala pa gayud masulbad.

Samtang sila si Konsehal Gilbert Arrabis ingon man si Konsehal Hiram Binatero nga kauban ni Gogong Arrogante midason sa pamahayag ni Diaz nga nanawagan sa dali nga kasulbaran sa kamatayon ni Arrogante.

 Laing nanawagan sa dali nga kasulbaran sa pagpatay ni Gogong mao ang Justice for Gogong Movement pinaagi sa ilang convenor nga si Sonny Luche. Matud pa ni Luche nga ang katawhan sa Daanbantayan nagkahiusa karon sa angayan nga buhaton aron ipakita nga ang kamatayon ni Gogong Arrogante nakapaisog hinuon kanila. - Pepe Sollano (BANAT NEWS)