Gidul-itan pagpusil

CEBU, Philippines -  Nabalbag ang ulo sa usa ka tricycle driver human gidul-itan sa pagpusil sa iyang pasahero mga alas 8:50 kagahapon sa buntag sa E.S. Binghay St., barangay Aliwanay lungsod sa Balamban.

Ang namatay giila sa kapulisan nga si Jocelo Tolero, taga barangay Prenza sa nahisgutang lungsod kinsa gidala pa unta sa Balamban District Hospital apan namatay kini.

Si Tolero sumala pa sa kapolisan nakaangkon og samad pinusilan diha sa iyang walang bahin sa ulo gikan sa wala matinong kalibre sa armas, gitumbok nga mamumuno sa biktima mao ang pasaherong diha milingkod sa iyang luyo nga gikan sa barangay Arpili.

Si PO2 Hannibal Larida sa Balamban Police Station nga gikahinabi sa Banat News dihang naabot sa nahisgutang lugar ang pasahero nga angkas niini kalit lang mipusil kaniya.

Ang ubang mga pasaherong babaye sa sidecar nangambak sa traysikol pagpanagan samtang ang mamumuno ang dali usab kaayong nakadagan agi sa kanipaan ug wala na gyud maabti sa kapulisan ingon man mga barangay tanod nga migukod.

Matud pa ni PO2 Larida nga kalit kaayo ang hitabo ug wala gyo’y bisan usa ka mga saksi nga naka-may-ong sa mamumuno bisan paman sa kahayag sa dapit, samtang ang mga saksi ila pa usab nga pakigkitaan nga giingong taga barangay Arpili labot niini. - Guam Logroño (BANAT NEWS)