'Hot lumber' sakmit sa Argao

CEBU, Philippines - Gidakop sa kapolisan sa Argao ang 30 ka mga tawo apil na ang usa ka retiradong opisyal sa kapulisan tungod sa paglusot og mga pinutol nga kahoy gikan sa Agusan Del Norte nga walay klarung mga dokumento diha sa pantalan sa sitio Lalaan barangay Bulasa sa lungsod sa Argao kagahapon sa alas 4:30 sa kaadlawon.

Ang gipangdakop samtang nagdiskarga sa mga kahoy ngadto sa usa ka truck mao sila si Golyer Regolacion, Junnifer Tuadles, Lando Tuadles, Charlie Serenio, Junnel Tuadles, Fernan Tuadles, Ginnie Torres, Noel Sarda, Jr Samante, Glecerio Tores, Milkuesec Pamolagan, Roldan Mejares, Rolando Serenio, Roque Melagrosa, Micheal Abella, Roger Amante, Roger Samante, Efren Torres, Glenn Paninsuro, Ritchie Canda, Moises SAmante, Nemiias Pantorilla, Ramil Maniao, Llyod Bustamante, Mark Loue Rama, Juluis Costanilla, Rey John Aguante, Demie Tabliso, Germogenes Nabua, pulos hingkod ang panuigon ug mga molupyo sa barangay Mangyan lungsod sa Sibonga.

Apil sa gidakop ang tag-iya sa maong mga kahoy nga si Antonio Medija nga usa ka retiradong koronel sa kapolisan nga taga barangay Punta Princesa siyudad sa Sugbo.

Ang maong mga kahoy gibana-banang mokantidad og sobra sa P700 mil, kini gikatahong dad-on unta sa dakbayan sa Sugbu.

Matud ni PO1 Benjamen Gerozaga sa Argao Police dihang nahinabi sa Banat News nakadawat og impormasyon ang kapulisan kabahin sa mga shipment sa pantalan sa Lalaan nga walay transport permit.

Subay sa gihimong pagsukit-sukit sa kapulisan kang Medija ang maong mga kahoy gikan sa Agusan Del Norte ug gamiton unta niya pagpatukod og balay.

Matud pa sa kapolisan hangtud nga di makapakita og legal nga dokumento si Medija di i-release ang maong mga kahoy samtang ang mga gipangdakop nga tawo gibuhian. - Darrel Carumba (BANAT NEWS)