Hepe sa Cordova PNP gireklamong hubog

CEBU, Philippines - Miabot na sa buhatan sa gobernador sa lalawigan sa Sugbu ang reklamo batok sa hepe sa kapolisan sa lungsod sa Cordova nga giingong hubog kun mo-duty.

Tungod niini, si Cebu Provincial Police Office director, Sr. Supt. Carmelo Valmoria mipaimbestigar kang Chief Insp. George Macapobre, ang gireklamong hepe sa Cordova Police Station.

Sigon ni Valmoria nga si Macapobre gipasanginlan nga kanunay nga hubog kun mo-duty ug manghasi pa sulod sa police station.

Gawas niini, nakadawat usab siya og reklamo gikan na mismo sa kaubang polis nga grabe kaayong mangasaba si Macapobre ngadto na sa iyang mga sakop.

Dugang pa ni Valmoria nga ang buhatan sa gobernador iya nang napahibawo nga may mga imbestigasyon nang gihimo aron pagsusi sa kamatuoran sa maong reklamo. - Chester Abadilla (BANAT NEWS)