4 sikop sa entrapment

CEBU, Philippines - Gipasakaan og kasong robbery-extortion ang upat ka tawo, duha kanila mga babaye human pasanginling nangilad sa usa ka tag-iya sa usa ka resort sa Malapascua sa lungsod sa Daanbantayan ug nagpailang sakop sa duha ka mga dagkong opisyales sa gobiyerno.

Si John Mark Villanueva ug manag-agawng Robert Duarte, Maricel Duarte ug May Ann Duarte gidakop sa Criminal Investigation and Detection Group (CIDG-7) atol sa entrapment operation niadtong Huwebes sa hapon diha sa usa ka coffee shop sa North Reclamation Area.

Ang tag-iya sa Malapascua Island Resort nga si Arlene Kuhtmann inubanan sa iyang operations manager nga si Jackielou Tapion midangop sa CIDG aron magpatabang human sila magduda nga gipangwartahan lang sila sa suspetsado.

Matud pa ni Tapion nga ang suspetsado mi-check in sa ilang resort niadtong Pebrero 26 ug nagpailang kauban sa advance party ni CEBAC party list representative Joel Villanueva ug ang bayad sa iyang pag check-in unya nalang kung maabot na ang maong opisyal.

Apan sa milabayng adlaw ang suspetsado mibiya sa maong resort nga walay pahibalo sa management ug niadtong Lunes si May Ann Duarte miadto sa maong resort ug miingon nga gisugo siya ni Villanueva pagkuha sa iyang mga butang ug ang bayad sa Marso 6.

Niadtong Huwebes sa buntag ang suspetsado mitawag sa operations manager ug miingon nga si Rep. Villanueva gustong magkigstorya sa tag-iya kay pasirad-an kini kay di kumpleto ang mga papeles sa operasyon niini.

Si Kuhtmann mitawag sa suspetsado aron pagklaro kabahin sa iyang gipanulti kung nganong masirad-an ang iyang resort kun kulang sila sa mga requirements nga giingong gipangayo nila ni Rep. Villanueva ug Tourism Secretary Ace Durano.

Apan diha na siya magduda dihang kini miingong mahimo kining balewalaon kun kini mohatag siya og P100 mil para kang Durano ug Rep. Villanueva ug sa BIR-7, maong gisumbong kini ni Kuhtmann kang Sr. Supt. Vicente Loot.

Sila si Chief Insp. Rogarth Campo midakop sa upat dihang gidawat ni Villanueva ang P5,000 nga marked money kang Tapion. Ang mga suspek kusganong mihimakak sa mga pasangil. - BANAT NEWS