CEBU, Philippines - Kapitan sa misangad nga barko diha sa Lagundi Reef ang gibuhian sa mga polis human ang mga abogado niini ang nakapakita og release order gikan sa piskaliya kagahapon sa buntag.
Si Chief Insp. Jovito Canlapan sa pakighinabi niini sa Banat News nagkanayon dunay kamandoan ang City Prosecutors Office nga pabuhian si Chen Guang Ming ang kapitan sa M/V United Majuro.
Ang maong barko midaro diha sa Lagundi Reef niadtong Huwebes sa buntag ug gipabayad og P5,000 nga multa nga maoy maximum nga penalty sa mga naguba nga gasang kini ubos sa ordinansa sa dakbayan.
Si Talisay City Prosecutor Marshall Rubia kinsa maoy miluwat sa release order nagkanayon nga walay ground nga idetiner pa si Ming tungod kay humana kini makabayad og multa.
Si Konsehal Shirley Belleza kinsa chairman sa Tourism Heritage Council nasagmuyo sa desisyon ni Rubia tungod kay ang nagubang gasang molanat pa og pila ka dekada una pa mabalik sa susamang gibag-on.
Si Belleza midugang nga angayan untang gipamulta ni Rubia si Ming sa matag gasang nga naguba niini ug sa pagyabo sa hugaw sa maong barko diha sa Lagundi Reef nga usa ka fish sanctuary.
Base sa unang assessment sa damage, mokabat ngadto sa 50 ka metros sa marine protected area diin nahimutang ang mga nagkalain-alang mga klase sa gasang ang gidaro sa M/V United Majuro.
Si Ming ang gipasakaan og kasong kalapasan sa ordinansa sa siyudad numero 2006-04 ug Akta Republika 9147 kon “An act of providing for the Conservation and Protection of Wild Life Resources and their Habitat.”
Base sa section 28 sa Akta Republika 9147, ang makalapas niini may maximum nga silot pagkabilanggo sulod sa unom ka tuig ug usa ka adlaw ngadto sa 12 ka tuig o pabayron og multa nga P100 mil ngadto sa P1 milyon kung ang mga mananap sa naapektahang lugar nameligrong mapapas tungod sa nabuhat nga kalapasan.
Si Ming ang mitanyag hinuon nga modonar og $10,000 (US) ngadto sa dakbayan isip tabang sa rehabilitation sa reef apan gihikay pa karon ang deed of donation sa city legal officer nga si Owen Algoso. - Brenda Batuto (BANAT NEWS)