Walay foul play

CEBU, Philippines - Walay foulplay sa kamatayon sa namatay’ng gipasanginlang masiao operator nga si Richelo Velos sumala pa sa autopsy report sa medico legal sa National Bureau of Investigation (NBI-7). Nasayran nga si Velos namatay human gituuhang giatake sa kasing-kasing dihang gironda sa grupo ni Chief Insp. Ma. Elma Delos Santos, hepe sa Provincial Investigation Branch (PIB) sa Cebu Provincial Police Office ang panimalay niini niadtong Pebrero 14.

Ang pagronda pinasikad sa search warrant nga giisyu ni RTC Judge Estella Sinco may kalambigitan sa illegal nga sugal.

Si Chief Insp. Ruben Cuizon ang hepe sa investigation section sa Provincial Investigation and Detective Management Branch (PIDMB) nga base sa autopsy ni Dr. Rene Cam, medico legal officer sa NBI-7 dunay mga pangos si Velos sa duha ka tuong tuhod, mga braso ug bitiis.

Sumala pa gawas niini walay senyales nga gibun-og si Velos sa kapulisan sukwahi sa gipasangil sa mga paryente niini, kini bisan walay bisan usa nga nakatestigong gidagmalan gyud kini.

Ang igsuon ni Velos nga si Pedro Velos midangop sa NBI-7 aron ipa-autopsy ang igsuon tungod sa mga bun-og nga ilang nakita sa lawas niini.

Hinuon si Sr. Supt. Carmelo Valmoria nagkanayon nga legitimate operation gyud ang nahitabo. Miresulta kini sa pagkasakmit sa daghang tally sheets sa maong illegal nga sugal, mga sinsilyong mokantidad og P2,050. Dugang sa pasangil sa pamilyang Velos sa kapulisan nga adunay P70 mil ang namatay apan nahanaw na kini, kini gipanghimakak usab ni Valmoria tungod kay wala hilabti ang bulsa sa namatay dihang gidala kini sa tambalanan. - Guam Logroño (BANAT NEWS)