Gikumot, gilaparo sa titser

CEBU, Philippines - Gireklamo ang usa ka magtutudlo sa Pasil Elementary School tungod sa giingong pagdagmal niini sa usa sa iyang mga tinun-an.

Ang mireklamo mao si Violeta Quirante human masayod nga ang iyang grade three nga apo gikatahong gikumot-kumot ang buhok ug gilaparo sa 62-anyos niining maestro (ngan gipugngan una sa Banat News).

Nahitabo ang insidente niadtong miaging Pebrero 17 dihang si Liza Marie Vergara maoy gipasanginlan sa maong magtutudlo nga mibugal-bugal kaniya sulod sa classroom.

Matud pa ni Quirante nga siya nasakitan sa gihimo sa maong magtutudlo ngadto sa iyang apo tungod kay ang maong buhat dili angayang himuon sa usa ka magtutudlo.

Gipatawag na sa barangay ang maong magtutudlo apan kini giingong arogante pa nga miangkon sa iyang gibuhat ngadto sa iyang tinun-an, kini gikatahong nasaksihan mismo sa principal sa maong tunghaan nga si Edwin Villamor.

Ang maong magtutudlo nangangkon atubangan ni Villamor nga iyang katungod isip magtutudlo ang pagdagmal sa iyang mga tinun-an aron kini madisiplina.

Dismayado si Quirante tungod kay giingong walay gihimo ang principal sa iyang reklamo hinungdan nga kini nidangop sa DyHP-RMN Cebu ug sa Banat News.

Gawas sa pagpangdagmal mipasangil si Quirante nga ang maong maestra kusog usab mamalikas ngadto sa iyang mga tinun-an.

Butang nga walay pupanalipod gihapon nga giangkon sa maong magtutudlo tungod kay giingong iya na nga nabatasan ang pagpamalikas.

Sa iyang bahin, wala malipay si DepEd-7 director Ricaredo Borgonia human masayod sa gihimo sa usa ka magtutudlo diha sa Pasil.

Tambag ni Borgonia ngadto kang Quirante nga mopadangat og pormal nga reklamo sa iyang buhatan aron maimbestigahan ang 62-anyos nga magtutudlo.

Gitataw sa DepEd-7 Director nga wala itugot ngadto sa mga magtutudlo ang pagpanapat ug pagdagmal sa ilang mga tinun-an.

Nasayran nga ang tinun-an wala na moeskwela tungod sa kahadlok sa maong maestra. – BANAT NEWS