Tunghaan naugdaw sa sunog

CEBU, Philippines - Naabo ang bag-ong nahuman nga eskuwelahan sa Guadalupe Elementary School sa barangay Guadalupe siyudad sa Carcar human kini masunog niadtong Huwebes sa alas 9:45 sa gabii.

Nadawat sa kabomberohan sa siyudad sa Carcar ang alarma sa sunog alas 9:45 sa gabii ug nakontrolar sulod sa 20 minutos ug gipaubos lang sa 1st alarm.

Ang danyos gibana-banang P100 mil   sa estraktura walay labot sa mga kagamitan niini particular ang mga school records ug uban pang importanteng dokumento.

Matud ni Insp. Ethel Margaha, fire marshal sa siyudad sa Carcar ang maong edipisyo mao ang faculty room ug gihimong opisina sa principal sa maong tunghaan.

Ang tunghaan sumala pa ni Margaha nag-imbentaryo pa sa mga dokumentong naapil sa sunog lakip na kabtangan.

Wala pa matino sa kabomberohan kun unsay hinungdan sa sunog tungod kay sumala pa gipawong man ang plangka niini alas 5:30 pa sa pagkahapon nianang adlawa.  - Darrel Carumba (BANAT NEWS)