Bata pisat sa water-tanker truck

CEBU, Philippines - Patay nang nahidangat sa tambalanan ang usa ka 9-anyos nga batang lalaki human maligsi og usa ka water tanker pagtabok niini sa highway sakay sa iyang biseklita sa barangay Nangka lungsod sa Balamban niadtong Huwebes sa alas 3:45 sa hapon.

Ang biktima mao si Lester Hayag, tinun-an sa grade 3 sa Nangka Elementary school ug molupyo ra usab sa nahisgutang lugar samtang ang drayber sa water tanker nga gipanag-iya sa Geo Transport Construction nga nakaligis kaniya mao si Abelardo Apas, 44.

Matud ni PO1 Alvie Agua sa Balamban Police dihang nahinabi sa Banat News, gikan sa barangay Lamac ang biktima ug pag-abot sa crossing wala makabantay sa maong water tanker paingon sa Poblacion.

Ang biktima napasok sa ilawom ug nalatayan sa ligid ug napiyapi ang lawas.

Gidali unta pagtabang ug gidala sa Balamban District Hospital ang biktima apan gideklarar kining dead on arrival.

Samtang ang drayber sa water tanker boluntaryo sab nga mitahan sa kapulisan. -  Darrel Carumba (BANAT NEWS)