P6.50 na ang plete

CEBU, Philippines - Sugod karong Lunes ipatuman na ang fare rollback nga 50 sentimos sa minimum nga pletihan sa pampublikong sakyanan dinhi sa Sugbu ug sa kinatibuk-ang Central Visayas.

Kini maoy gipahibawo kagahapon ni Regional director sa Land Transportation Franchising and Regulatory Board (LTFRB)-7 Romulo Bernardez.

 Matud ni Bernardez kini human aprobahi kagahapon sa LTFRB board -Manila pinangulohan ni Chairman Alberto Suansing ang fare rollback sa unang lima ka kilometro ug kini nagpasabot nga P6.50 na usab ang minimum.

Apan alang sa mga senior citizen, estudyante ug kadtong mga disabled person P5.20 ra ang ilang pletihan sa unang lima ka kilometro gumikan kini sa 20 porsiyentong diskuwento nga gihatag sa LTFRB.

Nunot niini, giawhag ni Bernardez ang mga PUJ drivers nga moadto sa ilang buhatan ug mokuha sa notisya sa bag-ong minimum nga pletihan apan kadtong dili makakuha niini mahimo gihapon silang mo-adjust nalang sa pletihan nga P6.50 sugod sa Lunes.

Samtang kadtong magmagahi pagsunod sa rollback mag-atubang sila og silot kun dunay moreklamo. Matud ni Bernardez nga kinahanglan ilista ang pangan sa driver ug ingon man ang plate number sa PUJ.

Sa pagka karon ang matag litro sa krudo dinhi sa Sugbu moabot ngadto sa P28. -  BANAT NEWS