Pamilya gisaka sa tulisan, inahan patay

CEBU, Philippines - Usa ka inahan ang patay ug naangol usab ang bana niini ug 13-anyos nga anak lalaki dihang gisaka sa ilang balay sa nag-inusarang tulisan samtang sila nagkalingaw og tan-aw sa telebisyon sa bukirang bahin sa sitio Banika, barangay Logo lungsod sa Borbon niadtong Miyerkules sa alas 7 sa gabii.

Ang namatay mao si Epefania Ybañez, 54, molupyo sa nahisgutang lugar samtang naangol sab ang bana niini nga si Edgar Ybañez Sr. ug 13-anyos niining anak lalaking si Edgar Jr.

Matud pa ni SPO2 Maximo Sanico sa Borbon Police dihang nahinabi sa Banat News ang namatay'ng Ybañez nagtan-aw og tv sa sala kauban sa anak babaye niining si Ana Marie, 21, dihang kalit lang misulod ang suspek dayung tion sa armas ug deklarar nga tulis.

Padayon pang gipangita sa kapolisan ang suspek nga sumala pa ni Sr. Supt. Carmelo Valmoria, director sa Cebu Provincial Police Office, nga nailhan na nila kini apan di lang nila ibutyag kun si kinsa tungod kay nagpadayon pa ang hot pursuit.

Apan misinggit ang biktima ug nangayo og panabang sa mga silingan hinungdan nga gipusil kini sa suspek ug naigo sa liog.

 Pagkadungog sa bana ug sa anak niining lalaki nga diha sa gawas nianang tungura, ang duha nagdali og saka sa taas, ang bana sa biktima pagkakita sa suspek daling milayog sa naulahi ug nakig-ilog sa armas.

Apan ang suspek nakahigayon pagpabuto sa armas diha sa tiyan sa bana hinungdan nga naigo kini apan giingong tapsing ra ang igo niini, samtang mao usab ang nahiagumang samad sa anak nga lalaki sa managtiayon.

Matud pang Valmoria, base sa pamahayag ni Insp. Camilo Gonzaga, hepe sa Borbon police station nga nakabawos ang bana pagtigbas sa tulisan ug nasamdan kini dihang miikyas.

Ang mga samaron gidala sa mga silingan ngadto sa Juan Dosado Memorial Hospital sa lungsod sa Sogod apan si Epefania gideklarar nga dead on arrival pag-abot sa tambalanan.

Ang kapulisan padayun pa sa ilang pagpangita sa nagbinugtong nga suspek nga pabilin pa karung gawasnon.

Si Valmoria nagkanayon nga bisan walay nakuhang kwarta ang maong tulisan apan dako ang ilang pagdudang tulis ang tuyo niini sa mga Ybañez.

Nasayran gikan kang SPO2 Maximo Sanico, usa sa mga polis sa Borbon nga sa sayo pa nianang adlawa gikatahong naka-claim og pension sa Social Security System (SSS) ang pamilyang Ybañez nga nagkantidad og P77 mil. – BANAT NEWS