Estriktong monitoring sa 2010 election kinahanglan - Mar

CEBU, Philippines - Si Senador Mar Roxas nga presidente sa Liberal Party sa nasud kagahapon nagkanayon nga kinahanglang mopatuman og estriktong pagbantay aron maseguro nga ang giplanong automation sa 2010 synchronized elections luwas sa halapad nga pagpanikas.

“Mahalaga ang opinyon at boto ng bawat mamamayan. Siguruhin natin na mabibilang ang mga ito nang tama,” si Roxas nagkanayon kinsa midugang, “ngayong naipasa na ang supplemental budget para sa computerization ng eleksyon sa susunod na taon, tumutok naman tayo sa pagsiguro na hindi ito magagamit na kasangkapan para sa mas malawakang dayaan.”

Ang Senador mi-aprobar sa gisugyot nga P11.3 bilyones nga poll automation budget sa marathon session sa miaging gabii sa wala pa i-adjourn alang sa Lenten break tungod sa kahadlok sa mga senador nga kuyaw masudlan sa tikas ang sistema.

Matud ni Roxas nga ang Comelec angayang motugot sa mga partido ug mga kahugpongan sa komunidad nga aktibong moapil sa pagpanday og mga “safeguards” alang sa pagpatuman sa computerized election sunod tuig.

Gitataw niya nga mahimong mapakubsan sa Comelec ang risgo sa sistema ug dili una ipatuman lukop nasud kun makadaot lamang kini sa kasagrado sa eleksiyon.

Dinhi sa Sugbo, si Kongresista Benhur Salimbangon sa ika-upat nga distrito sa lalawigan ug Kongresista Antonio Cuenco sa habagatang distrito sa dakbayan sa Sugbo nahinangop sa computerization sa eleksiyon.

Sama ni Salimbangon, nagtuo si Cuenco nga malikay sa flying voters ang paggamit og computer sa eleksiyon.

Si Jonathan Guardo, kandidato pagka-kongresista nga napilde ni Cuenco sa 2007, nagkanayon nga angayan lang nga i-computerize ang eleksiyon ilabi nga anaa na sa internet age ang kalibutan.

Pinaagi sa computer, matud niya, malikayan o maminusan ang panikas. – BANAT NEWS