Sibyaanan Gidasmagan og trak

CEBU, Philippines - Usa ka trak ang misampak sa usa ka radio station nga nahimutang didto sa barangay Baliwagan lungsod sa Balamban kagahapon sa alas 6:15 sa buntag.

Ang drayber sa trak mao si Reynaldo Villarmia, molupyo sa Subangdaku siyudad sa Mandaue human giingong aksidenteng miabante ang sakyanan samtang giayo di layo sa Radio Natin.

Maayong pagkaguba sa bungbong sa maong sibyaanan ug usa ka wala mailhing traysikad driver nga nagparking sa maong dapit gikatahong naangol.

Matud pa ni P02 Manuel Gilamon sa Balamban Police Station dihang nahinabi sa Banat News, giingong giayo sa drayber ang nagubang baterya niini sa wala pa ang hitabo.

Dihang iyaha kini gi- restart samtang diha kini sa gawas sa sakyanan kalit kining midagan ug misampak sa bungbong sa maong sibayaanan.

Matud pa sa kapolisan nalimtan sa drayber nga ibutang sa neutral ang kambyo niini maong dihang gipaandar ang makina midagan kini. - Darrel Carumba (BANAT NEWS)