CEBU, Philippines - Nabungkag ang bagul-bagul sa usa ka gwardiya human niya gikatahong gium-om ang kaugalingong armas ug gikablit sulod sa kasilyas sa bodega nga iyang gibantayan sa dalan S. Cabahug barangay Mabolo pasado alas 2 sa hapon sa miaging adlaw.
Si Noel Amojoy, 28, lumulopyo sa barangay Kasambagan sakop sa Spectrum Security Agency patay na dihang napalgan sulod sa bodega sa National Food Authority.
Ang karelibo niini nga si Romeo Lanoy mibutyag sa kapolisan nga sa wala pa kini mahitabo nangutana kaniya si Amojoy kun mobuto ba ang ilang armas samtang nag-ilis diha sulod sa kasilyas.
Giingong iyaha kining gitubag sa pag-ingon “ayaw binuang diha dong daghan baya nadisgrasya ana” ug iya nalang nga nadunggan ang buto sa armas.
Sa iyang (Romeo) pag-abli nakit-an nalang niyang nagbuy-od na ang biktima ibabaw sa iniduro nga nagsuot pa sa kompletong uniporme, nasayran sa kapolisan nga may problema sa pamilya si Amojoy.
Nakuha sa crime scene ang service firearm nga .38 revolver. - Lesley Caminade (BANAT NEWS)