Piniriso gigulgol sa kauban

CEBU, Philippines - Kritikal ang kahimtang sa usa ka piniriso human kini gituok ug gigulgol ug gibaid nga puthaw sa kaubang piniriso samtang kini nahinanok pagkatulog sulod sa selda sa kapulisan sa lungsod sa Tabogon niadtong Martes sa alas 11:30 sa gabii.

Ang piniriso nga nakaangkon og dakong hiwa sa liog mao si Bryan Garcia, 18, molupyo sa barangay Mabuli sakop sa maong lungsod kinsa nag-atubang og kasong murder ug sa milabay’ng tuig pa nabalhog sa maong bilanggoan.

Samtang ang suspek mao ra usab ang kaubang piniriso nga si Randy Ytang, 18, molupyo sa sitio Dunghoy, barangay Labangon sakop sa maong lungsod ug nag-atubang og kasong frustrated murder.

Matud ni PO2 Dino Caputol sa Tabogon Police Station dihang nahinabi sa Banat News sa sayo pa nagkabingkil na ang duha sulod sa prisohan.

 Atol sa tigpangatulog kalit kining gituok sa suspek ug pagkahuman gigulgol ang liog sa hait nga puthaw nga giporma og kutsilyo.

Apan ang kaguliyang nadunggan sa mga nag-duty nga mga polis dihang ang ubang mga piniriso nanawag ug nagpatabang kanila.

Daling gipagawas sa mga polis ang biktima nga nagkadugo na niadtong higayuna ug gihatud sa Verallo District Hospital sa siyudad sa Bogo apan tungod sa seryosong kahimtang gibalhin kini sa Vicente Sotto Memorial Medical Center (VSMMC).

Gituohan sa kapulisan nga nasuko lang ang suspek tungod sa ilang komedyahay sulod sa prisohan nga niresulta sa maong panghitabo tungod kay wala makauyon ang suspek sa komedya sa biktima ngadto kaniya.

Ang Tabogon Police Station dunay unom ka mga priso nga nabalhog sa detention cell niini nga gibahin og tag tulo ka priso matag selda. - Darrel Carumba (BANAT NEWS)