Barangay nga way assembly way honorarium

CEBU, Philippines - Gibaharan sa kadagkoan sa gobyerno nga suspensuhon ang honorarium sa mga opisyal sa barangay gawas lang kun makapahigayon sila og barangay general assembly sa katapusang Sabado ning buwana.

Ang maong bahad gipalanog ni Director Patricio Gabuya sa Department of Interior and Local Government (DILG) sa Cebu City,basin adunay mga opisyal sa barangay ning dakbayan sa Sugbo nga makalimot sa   Nationwide Synchronized General Assembly nga gitakda sa matag katapusang Sabado sa buwan sa Marso matag tuig.

Ang nahisgutang kalihokan gipahaom usab sa kamanduan ni Presidente Gloria Macapagal Arroyo sa pagpahigayon og barangay general assembly kaduha sa usa ka tuig.

Matud ni Cebu City DILG Director Patricio Gabuya nga gikinahanglan sa kabarangayan ang general assembly aron ipahibawo niini ang ilang mga accomplishment sa miaging tuig.

Gikinahanglang ipresentar gyud ang ilang mga nabuhat nga mga proyekto sama sa infrastructure, social project, training ug uban pa, ngadto sa ilang mga konstituwente, sumala ni Gabuya.

Labaw sa tanan, mao ang pagpahibawo sa ipatuman niining mga programa ug proyekto niining tuiga, lakip na ang pagdawat usab sa mga problema ug reklamo gikan sa mga mulopyo.

Nagkanayon si Gabuya nga ila nang gipadalhan og memorandum ang 80 ka barangay sa siyudad alang sa pagduyog sa nasudnong kalihukan.

Mibahad ang Cebu City DILG Director nga mag-atubang unya og problema ang mga barangay officials kung mapakyas sila pagpahigayon og general assembly niining buwana.

Usa sa isilot kanila mao ang dili pag-release sa ilang honorarium, matud pa ni Gabuya.

Gipadayag hinoon sa Cebu City DILG Director nga nakatuman ang tanang barangay pagpahigayon og general assembly sa miaging tuig.

Ang nationwide synchronized barangay assembly gitakdang ipahigayon sa katapusang Sabado sa buwan sa Marso ug Oktobre matag tuig.

Apan niingon si Gabuya nga mas maayo kung matag karon ug unya mopatawag og general assembly ang mga barangay officials.

Kini aron kanunay’ng mahatagan og kasayuran ang ilang mga konstituwente sa mga proyekto sa barangay ug mahatagan usab og dinaliang pagtagad ang mga reklamo niini. -  BANAT NEWS