Vendor gitusak og dunggab

CEBU, Philippines - Natusak sa mga samad ang lawas sa usa ka fruit vendor human kini lubaa samtang namaligya og prutas didto sa F. Ralota St.,barangay Poblacion, siyudad sa Danao kagahapon sa alas 4:45 sa kadlawon.

Ang biktima mao si Dionesto Alindajao Caraat, 19, ulitawo, nga taga barangay Tabok, sa maong dakbayan, samtang ang suspek nailhan lang sa ngalang Tordel nga taga Ylaya Poblacion, sa mao gihapong siyudad.

Si PO3 Dominic Tampus sa Danao City Police Station mibutyag sa Banat News nga samtang nagbantay sa iyang mga baligya nga prutas ang biktima, kalit lang miabot ang suspek nga nagpatuong kustomer.

Unya samtang nagtalikod ang biktima gihansakan kini sa kutsilyo hinungdan nga gitaupan dayon ang iyang buko-buko ug sa iyang paglingi giduslak na sab ang kilid sa iyang ulo, ug wala pa matagbaw giduslak na usab ang iyang walang dughan, walang abaga ug walang bukton.

Gihatod dayon kini ngadto sa tambalanan sa dakbayan sa Sugbo aron sa pagsalbar sa kinabuhi niini, samtang ang suspek padayon pang gipangita sa kapolisan karon. - Darrel A.Carumba (BANAT NEWS)