City hall way mahatag relocation site

CEBU, Philippines - Walay mahatag nga relocation site ang kagamhanan sa dakbayan sa Sugbu alang sa mga namuyo sa Citi-Center Commercial Complex diha sa barangay Kamagayan.

Kini maoy gipahibawo ni City Administrator Francisco “Bimbo” Fernandez taliwa sa plano sa city government pagbakante ug paghawan na sa maong lugar.

Gipadayag ni Fernandez nga walay tulubagon ang siyudad sa nahisgutang gatusan ka mga squatters tungod kay kini giingong dili mga lehitimong mga residente.

“Dili man gyud ni nato sila matawag og mga residente under the protection sa Urban Development and Housing Act (UDHA),” sumala ni Fernandez.

Ang pamahayag ni Fernandez gisuportahan usab ni acting mayor Michael Rama nga nagtuo nga ang Citi-Center alang ra sa patigayon.

“How can they qualify as an occupant when that’s supposed to be a Citi-Center that means it’s intended for anyone who would be into trade,” matud ni Rama.

Apan alang kang barangay kapitan Celestino Avila nga mga lehitimong residente ang namuyo sa Citi-Center tungod kay kini giingong mga rehistradong botante sa siyudad.

“Matawag na gyud nato na nga mga residente kay narehistro man ni sila, idiretso lang diay na nato sila og tugway sa Colon, daghan ra ba ni sila,” niingon si Avila.

Sugyot sa kapitan ngadto sa kagamhanan sa dakbayan nga paabangon na lang ang mga namuyo sa Citi-Center tungod kay kini giingong andam mobayad sa abangan.

Gusto nang hawanan sa City government ang Citi-Center niining buwana tungod kay ang luna nga nahimutangan niini giingong gamiton na sa dakbayan.

Gipanag-iya na sa kagamhanan sa dakbayan ang luna ug building sa Citi-Center tungod sa giingong kapakyas sa tag-iya pagbayad og buhis niini sa siyudad. – BANAT NEWS