Kampanya batok druga gingiponan

CEBU, Philippines - Labing gipangiponan sa Dangerous Drugs Board (DDB) ang kampanya niini batok sa illegal nga drugas pinaagi sa pagpahigayon og dayalogo sa tanang ahensya sa kagamhanan nga may labot sa pagsumpo sa maong kaso.

Kini ang gibutyag kagahapon ni DDB Chair Vicente “Tito” Sotto III sa iyang pagduaw dinhi sa Sugbo agig pagpaniid sa nagpadayon nga kinalit nga drug testing sa mga estudyante sa high school ning dakbayan sa Sugbo.

Usa sa mga giduaw nga eskuylahan ni Sotto mao ang Camp Lapulapu High School sa barangay Apas, nga mao gyu’y pagsugod kagahapon sa pag-testing sa unang hut-ong sa mga estudyante nga gipa-drug test.

Kauban si DDB Undersecretary Paul Clarence Oaminal , didto ibutyag ni Sotto ang bahin sa DDB action center diin bisan tua kini magbase sa Manila, apan masayran niini ang kalihokan sa ilegal nga drugas sa tibuok nasud pinaagi sa mga modernong kahimanan sa komunikasyon.

Gitawag kini og DDB Info and Action Center (DIAL) diin kutob ni kinsa mang may ikataho kalabot sa kalihokan sa mga tawong nagpadagan sa patigayong may labot sa ilegal nga drugas makahimo sa pagpadala og mensahe ngadto sa maong sentro pinaagi sa cellular phone o kaha sa land line .

Base sa ilang mga streamer ug mga poster, ang DIAL makontak pinaagi sa cell phone 09286637847 ug 09176637847 ug land line nga 9296623 ang direktang linya sa opisina ni Sotto alang sa mga sekretong taho bahin sa illegal nga drugas.

Nakigtagbo usab si Sotto sa mga piskal ug didto ipahibawo niya ang bahin sa dayalogo nga ilang himuon nga patambungan sa mga huwes, kapolisan, ug mga otoridad sa nagkalainlaing ahensya nga may labot sa paggukod sa illegal nga drugas sa tibuok nasud.

Matud pa ni Sotto nga gisugdan na nila kini didto sa kaulohan, ug isunod usab ang dinhi sa Kabisay-an sa tinguha nga ang tanang stakeholder o may labot ning maong kampanya nga gipangunahan ni Presidente Gloria Macapagal Arroyo maningkamot alang sa kalampusan niini.

Didto sa atubangan sa mga prosecutor nasayran ni Sotto nga usa sa mga hinungdan nga mabasura ang mga kaso bahin sa ilegal nga drugas mao ang kakuwang sa kapolisan sa hustong mga kasinatian sa pagdakop ug paghipos sa mga ebidensya batok sa dinakpan.  - Wen Celen ug Guam Logroño (BANAT NEWS)