CEBU, Philippines - Nagpabiling blanko ang kapulisan pagtumbok sa suspetsado nga mipusil patay usa ka tawo nga nagkanta- kanta sa usa ka vedioke bar didto sa Sitio Bayong, barangay Inayagan siyudad sa Naga niadtong Lunes sa ala 1:30 sa kaadlawon.
Ang biktima nga dead on arrival sa South General Hospital mao si Cesar Moises, 27, ulitawo apan dunay kapuyo, nga nagpuyo sa Bayong.
Gibutyag ni PO2 Ken Cabrera sa Naga City Police Station sa Banat News nga ang biktima nagsubay na sa karsada kay mopauli na sa ilang balay.
Dihang sa hapit na kini maabot sa ilang balay kalit lang gipusil sa wala hiilhing tawo.
Gani ang maguwang babaye sa biktima nga si Pamela Moises, hingkod, maoy misusi dayon sa lugar diin madungog nila ang buto sa armas tungod kay diha raman kini sa duol sa ilang balay.
Apan sa iyang paghiabot didto, maoy iyang nakita ang nagbuy-od na nga biktima nga naglunang sa kaugalingon niyang dugo.
Ang biktima nakaangkon og usa ka samad pinusilan sa iyang tiyan nga maoy hinungdan sa hinanali niining kamatayon.
Padayon pang gisusi sa kapolisan ang killer sa biktima. - Darrel A. Carumba (BANAT NEWS)