CEBU, Philippines - Nailhan na sa kapulisan sa dakbayan sa Sugbu ang ikaduhang suspetsado kauban nga mipusil-patay sa negosyanteng si Lalaine Jore sulod sa tindahan niini diha sa barangay Camputhaw niadtong Pebrero 17 sa niaging bulan.
Si Chief Insp. George Ylanan, ang hepe sa Investigation and Detective Management Branch sa Cebu City Police Office mitug-an sa mga tigbalita nga duna na silay pangalan sa ikaduhang suspetsado nga kauban sa retiradong sundalong si Felomino Amistad kinsa nag-atubang na og kasong murder.
Matud pa ni Ylanan tungod gihapon sa nakuha sa CCTV camera sa tindahan ni Jore ang side view sa profile niini sa wala pa pusila ang negosyante, apan di pa ikabutyag ang pangalan niini ug karon ilaha nang gipangita.
Sa sayo pa natumbok na usab sa kapolisan kung si kinsa ang posibleng mastermind apan ilang giangkon wala pa gyud sila’y lig-ong ebidensyang magtumbok niini sa maong krimen.
Niadtong Lunes napasaka na sa kapulisan ang kasong murder batok kang Amistad human kini masikop sa ilang panimalay sa dakbayan sa Carcar niadtong Sabado. - Guam Logroño (BANAT NEWS)