Ginang giluba namatay

CEBU, Philippines - Patay nang miabot sa tambalanan ang usa ka tindera human kini dunggaba sa makadaghan nga higayon sa sitio Huyong-huyong Alaska barangay Mambaling pasado alas otso sa gabii sa miaging adlaw.

Si Teresita Goliat Toring,44, taga sitio Nava gidunggab patay ni Corneto Ytang Banawa, 49, usa ka construction worker ug lumolupyo sa sitio Lawis, Alaska sa samang barangay.

Sa imbestigasyon sa kapolisan, ang biktima padulong sa Carbon Market kuyog ang iyang anak nga si Rosana, 19, ug ang onse anyos nga pag-umangkon.

Samtang naglakaw kalit lang silang gibabagan sa suspetsado nga may dalang kutsilyo ug way daghang pangutana gidiretso og hansak ang ginang.

Ang biktima nakaangkon og samad dinunggaban sa tuong bahin sa liog, walang bahin sa dughan ug uban pang parte sa iyang lawas nga maoy hinungdan sa hinanaling kamatayon.

Apan ang suspetsado wala usab makaipsot sa mga kamot sa mga estambay human mahibaw-ing gidunggab niini ang biktima.

Matud pa ni PO3 Lou Ayuman sa Homicide Section nga nahinabi sa Banat News nga gidudahan sa suspek ang biktima nga maoy misugo sa usa ka “Dennis” aron dunggabon ang iyang anak nga si Noli niadtong Pebrero 27 alas otso sa gabii. - Lesley Caminade (BANAT NEWS)

Show comments